Ministeerri Ittisaa US gamaaggama haleellaa Iraan booda hoogganaa tikaa ari’e!
OFM:Hagayya.24/2025-Ministirri Ittisaa US Peet Heegiz haleellaa Ameerikaan Iraan irratti raawwate ilaalchisee gamaaggama dhihaate Waayit Haawus erga fudhachuu didee booda hoogganaa tikaa aangoorraa ari’aniiru.
Pentaagoon ibsa isaa keessatti Leetenaal Jeneraal Jeefirii Kiruus hoogganaa Ejensii Odeeffannoo Humna Ittisaa US ta’anii hin tajaajilan jedhe.
Ajajoonni waraanaa gameeyyiin biroo lamas aangoorraa kaafamaniiru.Ministirri Ittisaa US waa’ee namoota ari’amanii sababa isaa waliin ibsa ga’aa hin kennine.
Waxabajjii darbe jiddugala humna ittisaa US kan ta’e Peentaagon waa’ee haleellaa US qilleensarraan Iraan irratti raawwatee gamaaggamuun wayita gabaasa dhiheessu, haleellaan raawwatame buufataalee niwukilaraa Iraan akka hin barbadeessine ibsee ture.
Qorannoon jalqabaa tarii haleellaan kun karoora gabbisa niwukilaraa Iraan ji’ootaan boodatti deebisuu mala kan jedhu ture.
Yeroo sana Waayit Haawus gamasaan ”kun gamaaggama dogongoraa” tuuta tikaa fi odeeffannoo dadhaboo ta’aniin miliqee ba’eedha jechuun kuffisee ture.
Pireezidaantiin US Doonaald Tiraamp buufataaleen niwukilaraa Iraan guutummaa guutuutti barbadaa’eera jechuun jala muranii dubbatan.
”Seenaa keessatti tarkaanfii waraanaa milkaa’aa ta’e xiqqeessuuf,” tarkaanfii miidiyaaleedhaan fudhatamuuf yaalameedha jechuun gamaaggama dhihaate kuffisan.
Kora Nato yeroo sanatti gaggeeffamee ture irratti Heegiz gabaasichi kan dhihaate ”odeeffannoo tikaa gadi bu’aa fi hin bilchaanne” irratti hundaa’uun jedhan.
FBI odeeffannoo miliqee ba’e kana qulqulleessuuf qorannoo eegaluus ibsanii turan.Kiruus ari’amuu jalqabe kan gabaase Waashingitan Post ture.
Ejensiin Nageennaa Raayyaa Ittisaa US qaama Peentaagon kessaa tokko yoo ta’u hojiilee ykn ergama isaa milkeessuuf odeeffannoo waraanaa irratti hirkata.
Ejensichi odeeffannoowwan teeknikaa heddumminaan walitti qabus, odeeffannoon CIA fi ejensiiwwan tikaa kaan irraa argaman garuu adda.
Heegiz ajajaa eeggataa hoogganaa humna galaanarraa fi hoogganaa addaa humna waraanaa Humna Galaanarraa US aangoosaaniirraa akka ka’an ajaja dabarsuu maddeen eennummaansaanii akka eeramu hin feene Rooyitarsitti himaniiru.
Seenaatarri US Maark Waarnar ibsa baasan keessatti ari’amuun Kiruus bulchiinsi Tiraamp ”waajjira tikaa eegumsa biyya keennaaf oolchuu mannaa bakka itti amanamtoota isaanii horatan gochuun itti fayyadamuun amala balaafamaadha,” jechuun akeekkachiisan.
Pireezidaant Tiraamp aanga’oota yaada isaaniin walii hin galle yookiin yaada faallaa dhiheessan hedduu aangoorraa kaasaniiru.
Adoolessa darbe garee isaanii keessatti Komishinara Istaatistiksii Hojjettootaa kan ta’an Eriik Maaktarfarn hojiirra akka gaggeeffaman ajajan.
Kunis erga qondaalli kun guddinni hojjetaaf kennamu akkaan gadi bu’uu eeraniiti. Hoogganichi gabaasa qabiyyee akkanaa qabu erga dhiheessanii yerosuma aangoorraa kaafaman.
Ebla darbes sababuma walfakkaatuun Daarektara Ol’aanaa Ejensii Nageenna Biyyaalessaa Timootii Haawu hojiirraa ari’an.Akkasumas hojjettoota mana maree nageenya biyyaalessaa Waayit Haawus hedduu ari’an.
Heegiz gamasaaniin Peentaagon keessatti qondaalota waraanaa hedduu ari’aniiru.
Guraandhala darbe Jeneraala Humna Qilleensaa Sikee Biraawun adimiiraalotaa fi jeneraalota shan faana aangoosaaniirraa kaasaniiru.
Maddeen Oduu kanaatiif ‘Wall street journal,BBC, AP, CNN’ waabeffanne.
Odeeffannoo haarofti yeroo-yeroon akka isin dhaqqabuuf Link armaan gadii cuqaasaa…
https://t.me/oromiafreedommedia
https://youtube.com/@oromiafreedommedia…?