Manni Murtii Waliigalaa himanni lamaan Obbo Taayyee Danda’aa irraa bilisa jedhaman akka itti fufu ajaje.
OFM:Waxabajjii.02/2025-Obbo Taayyee Danda’aa waggaa tokkoon dura aangoo Deetaa Ministira Nagaa irraa erga kaafamaniin booda mana jireennaa isaaniitii qabamuun hidhamanii himatawwan sadii irratti banamee akka ture gabaasuun keenna ni yaadatama.
Himata isaanii ilaalaa kan ture Manni Murtii Ol’aanaa Federaalaa dhaddachi Lidataa himatawwan sadii Obbo Taayyeen ittiin himataman keessaa himata lama ofirraa ittisuun osoo isaanirraa hin eegamne bilisa akka ta’an ALI Adoolessa 30/2016 murteessee ture.
Eegasii booda mirgi wabii isaaniis eegamee mana hidhaatii bahuun himata tokkicha dhimma meeshaa waraanaa seeran alaa qabachuu ilaalu irratti mana murtiitti deddeebi’anii himatasaanii hordofaa turan.
Gama kaaniin Abbaan Alangaa himatawwan lamaan Obbo Taayyeen ittiin bilisa jedhaman ‘Diina waliin waloomuu’ jedhu seera yakkaa Itiyoophiyaa keewwata 25/C fi keewwata 257/E darbaniiru jedhamanii booda bilisa bahan ol iyyannoo itti gaafate.
Abbaan Alangaa Waliigalaa Federaalaa Obbo Taayyeen ”hololli farreen nageenyaa ABO Shanee fi Faannoo fudhatama akka argatu yaaduun ergaawwan sochii qaamolee kanneenii deeggaran karaa Feesbuukii isaanii qoodaniiru” jechuun, kanaafis himata kanarraa bilisa ta’uu hin qaban erga jedhanii dhimmi isaanii Mana Murtii Waliigala Federaalaatti ilaalamaa tureera.
Obbo Taayyeenis adeemsa falmii Mana Murtii Waliigalaa Federaalaatti ture kana abukaatoo isaanii waliin ta’uun falmachaa kan turan yoo ta’u, manni murtichaas dhimma himata lamaanii kanarratti jala murtii kennuuf har’atti beellama qabatee ture.
Abukaatoon Obbo Taayyee Danda’aa Obbo Abarraa Niguus BBC’tti akka himanitti, Manni Murtii Waliigalaa Federaalaa dhaddacha Wiixata har’aa ganama taa’een ol iyyannoon Abbaa Alangaa waliigala Federaalaa fudhatama argachuun himata lamaan bilisa jedhaman akka ofirraa ittisan ajajeera jedhan.
“Manni Murtii Olaanaa Federaalaa himatawwan lamaan kanarratti akka ofirraa ittisan ragaa gahaan osoo jiruuyi bilisa kan jedhe. kanaafuu himatamaan kun ragaalee ittisaasaa dhiheeffatanii himatichi akka itti fufu” jechuun murteesse jedhan.
Kanaaf jechas himatni lamaan ammaan dura bilisa ittiin jedhaman galmeen gara mana murtii ol’aanaa Federaalaatti deebi’ee falmiin itti fufa jedhan Obbo Abarraan.
Obbo Taayyeedhaaf mirgi wabii kan eegameef himatawwan sadan keessaa lamaan bilisa jedhamee ta’uu hordofees mirgi wabii ammaan dura isaaniif eegame itti fufamoo nikaafama kan jedhu beellama mana murtii Ol’aanaa Federaalaa itti aanurratti kan beekamu ta’as jedhan.
Murtii har’a Manni Murtii Waliigalaa Federaalaa dhimma oliyyannoo Abbaan alangaa dhiheeffate irratti dabarse kana hordofees Obbo Taayyee Danda’aa akkuma yeroo jalqaba himatamanii himatawwan sadaniin falmii isaanii kan itti fufan ta’a.
Adeemsi himataa fi beellamaas galmeen erga mana murtii olaanaa Federaalaa dhaddacha Lidataa gaheen booda kan beekamu akka ta’es abukaatoon Obbo Taayyee himaniiru.