Hamaas hanga biyyi walabaa Filisxeem ijaaramutti ‘waraana hin hiikkadhu’ jedhe.
OFM:Hagayya.03/2025-Israa’el Gaazaatti dhukaasa dhaabuuf wantoota akka haldureetti qabatte keessaa tokko Hamaas waraana akka hiikkatu ta’us, garichi garuu hanga biyyi walabaa Filisxeem hundaa’uutti hiikkachuuf tole akka hin jenne beeysise.
Hidhataan Filisxeem kun yaada ergamaa addaa pireezidaantii US Doonaald Tiraamp kan Baha Jiddugalaa Istiiv Witkoof Hamaas ”waraana lafa kaahuuf waliigaluu ibseera” jechuun kennaniif deebii kenne.
Israa’el Hamaas waraana hiikkachuun dhibdee hamaa naannichatti xummura gochuuf furtuu ijoo akka ta’e kaafti.
Mariin al-kallattii Israa’eliifi Hamaas jidduutti dhukaasa dhaabuufi warra butan gadhiisisuu torbee darbe eegalee tures danqameera.
Guyyoota muraasa darban mootummootni Arabaa Hamaas hidhannoo akka hiikkatuufi to’annoo Gaazaa dabarsee akka kennu gaafataniiru.
Kunis erga biyyootni Lixaa akka Faransaayiifi Kaanadaa Filisxeemiif beekamtii biyyummaa akka kennan ibsuu booda.
UK gama isiin Israa’el haaldureewwan irraa eegamu hin guuttu yoo ta’e Filisxeemiif beekamtii akka kennitu ibsiteetti.
US, UK fi Gamtaa Awurooppaa keessatti garee shororkeessaa jedhamee kan labsame Hamaas ibsa baaseen, ”yoo biyyi walabaa Filisxeem magaalaa guddoosaa Jerusaalem godhate hundaa’uu baate mirga qabsoo kiyyaa fi waraana lafa hin kaahu” jedhe.
Ibsi Hamaas kun kan dhagahame Israa’el mariin yoo milkaahuu baate waraana itti fufuuf wayita dhaadatteettiidha.
Ministirri Ittisaa biyyattii Letenaant janaraal Eyaal Zamiir ibsa Jimaata darbe kennaniin mariin yoo fashale Gaazaa keessatti waraanni gaggeeffamu hin dhaabatu jedhan.
Mariin miilanaa kun namoota Hamaasiin butaman gadhiisisuurratti xiyyeefata.
Sambata darbe kana ammoo maatii nama butame tokkoo Hamaas viidiyoo gadhiiseen beelaan isa miidhaa jira jechuun ibsa baasaniiru.
Mootummaan Israa’eliifi US waan danda’an mara gochuun lubbuusaa akka oolchan waamicha dhiyeessan.
Ergamaan addaa US Witkoof gara Israa’el kan imalan wayita gaaga’ama namoomaa Gaazaaf dhiibbaa guddaa jala jirtuttiidha.
Ejensiin UN Gaazaatti beelli nam-tolchee hamaan mudachaa akka jiru akeekkachiiseera. Kanaafis Israa’eliin komateera.
Israa’el ulaa dhiyeessii gargaarsaa danqite jedhamtee himatamtus danqaa akka hin goone ibsuun ”beelluu hin jiru” jetti.
Wiitkoof yaaliiwwan nagaa buusuu waaraana dhaabuufi namoota butaman gadhiisisuurratti akka xiyyeefatu himan.
Ragaa haaraa gama UN irraa bahuun walakkeessa Waxabajjiirraa kaasee namootni 1,273 ta’an deeggarsa argachuuf osoo yaalanii ajjeefamaniiru.
Heedduun isaanii daangaa Israa’eel bakka dhiyeessii deeggarsaa USn deeggaramu kennamutti loltoota Israa’eliin ajjeefaman.
Israa’el Hamaas iddoo sanitti ta’e jedhee muddama uumaa jira jechuun himatti. Dabaluunis loltootnishee ta’e jedhanii namoota nagaarratti hin dhukaafne jette.
Waraanni Israa’eliifi Filisxeem kan eegale Onkololessa bara 2023 yoo tahu,hanga amma Gaazaatti namootni 60,000 ol ajjeefamaniiru.