Raashiyaan talaallii kaansarii argachuu isii ifoomsite!
OFM:Hagayya.04/2025-Talaalliin kaansarii Raashiyaa keessatti hojjetamee fi dhukkubsattoota kaansariif kennamu Adoolessa bara 2025 kan oomishamu yoo ta’u, fayyadamtootaaf bilisaan akka dhiyaatu The Economic Times gabaaseera.
Talaalliin kun dhukkubsataa kaansariif kan kennamu yoo ta’u, tilmaamaan doolaara 2,869 kan baasu yoo ta’u, to’annoo addaatiin lammiileef bilisaan kan raabsamu ta’uu Ministirri Fayyaa Raashiyaa beeysiseera.
Talaalliin kaansarii Raashiyaa keessatti hojjetame kun sammuu namtolchee fayyadamuun kan kennamudha; sirna ittisa dhukkubsataa akka guddisuu fi kaansarichi qaama dhukkubsataa keessatti saffisaan akka hin babal’anne akka godhu himama.
Hogganaan Jiddugala Qorannoo Fayyaa Ol’aanaa Raashiyaa Andiree Kaaprin akka jedhanitti talaalliin dhukkubsattootaaf kennamu kun qoricha aadaa miti.
Argannoon Raashiyaa guddina kaansarii baay’ee daddarbaa to’achuun lubbuu namaa baraara jedhame muuxannoo dhukkubsattoota hedduu keessatti bu’aa abdachiisaa agarsiiseera jedhan itti gaafatamaan Ministeera Fayyaa Raashiyaa.
Gaazexaan Economic Times akka gabaasetti lammiileen Raashiyaa miiliyoona 4 ta’an kaansarii waliin jiraataa kan jiran yoo ta’u, waggaatti 625,000 ammoo carraa kaansariif saaxilamu jechuun Ministeera Fayyaa Raashiyaa waabeeffachuun gabaaseera.