Kaanaadaan hariiroon Ameerikaa waliin ture obba’eera jette.
OFM:Sadaasa.28/2025-Ministirri Muummee Kanaadaa dhihoo kana filaman hariiroon kanaan dura biyya isaanii fi US jidduu ture xummuramuu ibsan.
Hariiroon isaan jedhan kun kan ”walta’iinsa diinagdee, nageenyaa fi humna waraanaa irratti hundaa’e,” ture.Diinagdeen Kanaadaa akkaataa taarifa haaraa Pireezidaanti Tiraamp kaa’an dandamachuu danda’uun akka haaraatti ijaaramuu qaba jedhan.
Kanaadaanis gama isiitiin taarifa kaa’uun haaloo ni baati jedhan qondaalli kun ibsa gaazexeessitootaaf kennaniin.
Taarifni kaa’anis diinagdee US irratti ”dhiibbaa guddaa” kan qabaatu ta’uu ibsan.
Tiraamp Roobii darbe konkolaattotaa fi qaamolee konkolaattotaa alaa galan irratti gibira dhibbeentaa 25 dabaluu ibsaniiru.
”Kun dhaabbiidhaan itti fufa,” jedhan Donaald Tiraamp.
MM Kanaadaa gamasaaniin waliigaltee meeshaalee awutoomootiivii kana bara 1965 biyyoonni lameen waliif mallatteessan (Canada-US Automotive Products Agreement) jireenna isaanii keessatti waliigaltee akkaan murteessaa ta’uu ibsaniiru.
”Waliigalteen ture sun sababaa taarifa kanaa obba’eera,” jedhan.
US bara darbe qofa konkolaattota miiliyoona saddeet Kanaadaa irraa galchite. Daldalli kun doolaara Ameerikaa biiliyoona 240tti tilmaama.
US gibira dabaltus Kanaadaan oomishaalee awutoomootiivii ittuma fufti kan jedhan qondaalli kun, diinagdee biyyattii kan olaantummaan to’atu uummata biyyattii ta’uu ibsan.
Adeemsi kun eennu waliin hariiroo daldalaa akka cimsan kan of keessaa qabu ta’uus eeran.
Kanaadaan hariiroo daldalaa US waliin itti fufuun turree kan ilaallu ta’a jechuunis yaada kana rarraasanii hambisan.
MM Kaarniin kanumaan dhimma taarifa meeshaalee gara biyya keessaa seenanii irratti dabaluu fi akkamiin akka qolatan qabxii ijoo duula na filadhaa isaanii godhatan.
Maark Kaarnii MM duraanii Jastin Turuudoo kan bakka bu’an yoo ta’u filannoon waliigalaa ammoo ji’a dhufu keessa, Ebla 28, gaggeeffama.
US oomishaalee Kanaadaa irraa seenan hunda irratti gibira dhibbeentaa 25 dabalteetti. Oomishaalee aluuminiyeemii fi sibiilaa irrattis dhibbeentaa 25 dabalte.
Kanaadaanis oomishaalee US hundarra waliigalatti taarifa doolaara Ameerikaa biiliyoona 42 ta’u kaa’uun haaloo baateetti.
Waayit Haawus akka ibsetti taarifni haaraan Ebla dhufu gaafa bultii 2 hojiirra oola. Konkolaattota gara biyyaa galchuurratti jijjiiramni taasifame ammoo guyyaa itti aanu.
Donaald Tiraamp Kamisa kaleessaa Bitootessa 27, 2025 Gamtaan Awurooppaa fi Kanaadaan tokkoomuun US irratti waraana daldalaa akka hin banne akeekkachiisaniiru jechuun BBC,AFPfi Miidiyaaleen biroo gabaasuurratti argamu.