Biriiteen ”godaansa seeraan alaa” dhaabuuf yaa’ii biyyoota 40 hirmaachise gaggeessuufi.
OFM:Sadaasa.31/2025-Yunaayitid Kingidam ”godaansa seeraan alaa” yaaddoo addunyaati jetteen dhaabsiisuudhaaf yaa’ii biyyoonni 40 irratti hirmaatan guyyoota lamaaf gaggeessuuf.
Yaa’iin ministirri mummee biyyatti Kiir Israarmar keessummeessan kunis namoota dadabarsa namootaa seeraan alaatiin ”daldala sukkanneessaa” raawwatan dhaabsiisuufi biyyoonni goodaansa irratti haala ”irratti wal dhaban” furuufi jedhameera.
Yaa’iin Wiixata har’aa eegaluufi adda ta’un isaa himame kunis ”bu’aa qabatamaa” fiduufi wal ta’iinsa idil-addunyaa cimsuurratti kan kiyyeefate jedhameera.
Godaansi siyaasaa Yunaayiti Kingidam keessaa ajandaa ijoo mootummaa taasifamuun kan ilaalamu yoo ta’u, mormitoota aadaa cimsaniif ta’e warri riifoormistootaa, paartii UK biyya bulchuu Leebar dhimmicha to’achuu hin dandeenne jechuun himatu.
Yaa’ii kanaan dura Waajjirri Dhimma Biyya Keessaa networkii namoota seeraan ala nama daddabarsan diiguufi himannaa jajjabeessuuf Paawundii miilyoona 33 akka baasuu beeysiseera.
Qondaaltonni Veetnaam, Albaaniyaa fi Iraaq dabalatee qondaltoonni biyyoota godaantonni hedduun irraa gara UKtti imalanii bakka bu’oota kana akka Faransaay, Chaayinaa fi Ameerikaa waliin walgahii Landan Laankaaster Haawusitti gaggeeffamu irratti ni hirmaatu.
Akkasumas jilli Mootummaa Naannoo Kurdootaa, Interpoolii fi dhaabbilee miidiyaa hawaasaa Meta, X fi TikTok dabalatee, daldala yakkaa waggaatti tilmaamaan doolaara biiliyoona 10 (£7.7bn) baasuu kana akkamitti akka dhaabamu danda’uurratti marii kana irratti hirmaataa jiraachuu BBC’tu gabaase.
Bara 2025 hanga ammaatti namoonni 6,000 ol bidiruu xixiqqaan Chaanaalii qaxxaamuranii gara UK dhufuudhaan waggaa tokkoof jalqaba rikoordii taasiseera.