UNICEF Daa’imman Itiyoophiyaa fi Naayijeeriyaa miliyoona tokkoo ol hanqina nyaataaf saaxilamuu ibse.OFM:Sadaasa.22/2025- Dhaabbata Mootummoota Gamtoomanii Dhaabbanni Daa’immanii (UNICEF) Itiyoophiyaa fi Naayijeeriyaa keessatti daa’imman umuriin isaanii waggaa shanii gadi ta’e miiliyoona 1.3 ta’an kanneen hanqina nyaataa cimaa qaban bara kana qarqaarsa lubbuu baraaruu murteessaa ta’e dhabuudhaaf saaxilamuu ibseera.Dhaabbatichi hanqina maallaqaa irraa kan ka’e ji’oota lamaan dhufan keessatti hanqina nyaataa daa’immanii yaaluuf qarqaarsa nyaataa lubbuu baraaru akka dhaabu ibse.Hanqinni gargaarsa nyaataa lubbuu baraaruuf ejensicha muudate sababaa murtee preezdaantiin Ameerikaa Doonaald Tiraamp qarqaarsa biyya alaa addaan kutuu isaaniitiin akka ta’e eereera.Itti aanaan daayreektara ol’aanaa UNICEF Kitty van der Heijden Jimaata darbe Jenevaatti ibsa gaazexeessitootaaf kennaniin bu’aan waggoota digdamii shanan darban keessatti argame sababaa maallaqaan baay’ee hir’achuu isaatiin duubatti deebi’uu fi rakkoo guddaaf saaxilamuu akka danda’u dubbataniiru.”Maallaqni haaraan yoo hin argamne malee, UNICEF ji’a Caamsaa keessa Nyaata Lubbuu Baraaruu (RUTF) daa’imman hanqina nyaataa qaban yaaluuf ni dhumu jedhamee eegama.Kun ammoo daa’imman Itiyoophiyaa keessatti tilmaamaman 74,500 ta’an kanneen ji’a ji’aan wal’aansa barbaadaniif rakkoo hamaa qabaata.””Naayijeeriyaa keessatti ji’a ji’aan daa’imman gara kuma 80 ta’an wal’aansa barbaadu, ji’a kanaa hanga dhuma Caamsaa jidduutti dhiyeessiin nyaata lubbuu baraaru (RUTF) nu jalaa dhumuu danda’a,” jedhan Vaan der Heeyden jechuun Miidiyaalee dabalatee maddeen gabaasaa jiru.Ji’a Amajjii keessa Pirezidaanti Tiraamp baasii mootummaa hir’isuuf jecha hojii USAID akka kutan beeysisaniiru.Tarkaanfiin pireezdaantichaa kun Dhaabbata Fayyaa Addunyaa fi qaamota misoomaa idil-addunyaa birootiin kan balaaleffatan yoo ta’u, biyyoota guddataa jiran, keessumaa Afrikaa keessatti qarqaarsa alaa irratti hirkatan hedduu balaadhaaf saaxilee jira.USAID waggoota kurnan sadii oliif Afrikaa keessatti tattaaffii dhukkuba busaa, HIV/AIDS, dhukkuba tiruu, fi dhukkuboota biroo ittisuuf taasifamaa jiruuf arjooma guddaa ta’ee jira.Itti aanaan itti gaafatamaa UNICEF kun sagantaalee fayyaa Itiyoophiyaa keessatti tajaajila soorataa fi wal’aansa busaa dubartoota ulfaa fi daa’immaniif kennan irratti dhiibbaa hamaa guddaa kan geessise ta’uu ibsan,.itti aanaan itti gaafatamaa UNICEF akka jedhanitti sababaa kanaan naannoo Affaaritti qofa kilinikoonni fayyaa socho’oo digdamii sadii sababa hir’ina maallaqaatiin tajaajila ala ta’aniiru, yeroo ammaa tajaajila kennaa kan jiran torba qofa.Kaaba baha Naayijeeriyaa keessatti daa’imman hanqinni nyaataa cimaan isaan muudataa jira, sababa fincila shororkeessitootaa fi hidhattootaatiin namoonni kumaatamaan lakkaa’aman ajjeefamanii, miliyoonaan lakkaa’aman qe’ee isaanii irraa buqqa’aniiru.Donaald Tiraamp aangootti erga deebi’anii sa’aatii muraasa keessatti qarqaarsi biyya alaa imaammata isaanii waliin hangam akka walsimu hanga murtaa’utti akka dhaabbatu ajaja dabarsuun isaanii ni yaadatama.Biyyoota hiyyeeyyii addunyaa dabalatee biyyoota 120 keessatti qarqaarsa fayyaa fi hatattamaa kan kennu USAID hojii isaa ji’oota sadiif akka addaan kutu ajajame.