OFM:Hagayya.12/2025-Pireezidaantiin Ugaandaa Yuweerii Museveenii walitti dhufeenna biyyi isaanii Masirii waliin qabdu fooyyessuuf darbees Laga Abbayyaa irratti tumsa biyyoota naannoo cimsuu kaayyoo jedhuun Pireezidaantii Masirii Abdulfaataa Al siisiin affeeramanii daawwannaa guyyoota sadiitiif Kaayiroo kan jiran tahuun gabaafame.
Imalli Muuseveeniis, Ministirri Alaa Masirii Dooktar Badrii Abdillaatiin Ugaandaa magaalaa Entebeetti simatanii erga haasofsiisan booda turtii torbee tokkoo gadii keessatti kan taasifameedha.
Museveeniin wayita Ministira Alaa Masiriin Entebeetti wal argan, rakkoon bishaan Abbayyaan wal-qabatee jiru, kan siyaasa naannoo yaa’a bishaan kanaa (Geopolitics) osoo hin taane, biyyoottan yaa’a lagichaa gara olii fagoo jiran gammoojjii ta’uu fi misoomaaniis duubatti hafoo ta’uudha jedhanii turan.
Akka UGDiplomat gabaasetti, amma lagni Abbayyaa sababa qonna boodatti hafaa naannoo yaa’a laga kanaatti raawwatamuu fi mancaatii bosonaaf rakkoo jabaa keessa jira.
Biyyoottan yaa’a laga Abbayyaa kunis akkamiin laga kanarra osoo miidhaan hin gahin fayyadamna karaa jedhuun maree bal’aa gaggeessuu akka qabanis Muuseveeniin dubbataniiru.
Dhaabbanni oduu UGDiplomat, qabiyyeen maree gaggeessitoota biyyoottanii kun ifa ta’uu baatus, mata dureewwan bulchiinsa qabeenna bishaanii, dhiibbaa jijjiirama qilleensaa fi misoomni bu’uraalee misoomaa ka’uun waan eegamu jechaan gabaase.