Tigraayitti namoonni 1,424 saree maraatteen ciniinamanii, namoonni 7 du’uun gabaafame.
OFM:Adoolessa.15/2025-Inistiitiyuutiin Fayyaa Hawaasaa Naannichaa akka beeysisetti, naannoo Tigraayitti namoonni 1,424 saree maraattee ciniiname, namoonni 7 lubbuun isaanii darbeera.
Daarektarri Ol’aanaa Inistiitiyuutichaa Dr. Hayelom Kasay akka ibsanitti, Tigraay naannolee dhibee sareetiin irra deddeebiin miidhaman keessaa tokko yoo taatu, aanaalee 25 keessatti namoonni 1,424 ciniinamanii, namoonni 7 du’aniiru.
Inistiitiyuutichi sareewwan karaa irraa badan,talaaluu fi dhabamsuusuu irraa eegalee hojii guddaa hojjetaa jiraatus, ammas lakkoofsi namoota saree maraatteen qabaman dabalaa akka jiru Daarektarri Ol’aanaan kun dubbataniiru.
Akkasumas, weerarri pooliyoo aanaalee naannichaa lama keessatti muudate duula talaallii pooliyoo Inistiitiyuutii Fayyaa Hawaasaa Itiyoophiyaa, Ministeera Fayyaa fi dhaabbilee michuu waliin ta’uun gaggeeffameen guutummaatti to’atamuu ibsaniiru.
Weerarri biraa, yeroo baay’ee “Aba Sanga” ykn (Anthrax) jedhamuun kan beekamu, kan namaa fi bineeldota miidhe, aanaalee naannichaa 40tti babal’atee namoota 1,269 qabamanii, namoonni 10 du’uu kan himan Daarektarri kun,”Bineeldonni hedduun dhukkuba kanaan du’aniiru”jedhan.
Weerarri naannichatti muudate sababoota adda addaa qabaatus, waraanni fi walitti bu’iinsi kun dhiibbaa guddaa akka qabu hubachiisaniiru.