Netaaniyaahuun Gaazaa guutummaatti humnaan qabachuuf yaada dhiyeessuufi jedhe miidiyaan biyyattii.
OFM:Hagayya.05/2025-Ministirri Mummee Israa’el Beenjaamiin Netaaniyaahuun yeroo kaabinee nageennaa waliin wal-gahu Gaazaa guutummaatti humnaan qabachuuf yaada dhiyeessuuf jira jechuun miidiyaan Israa’el gabaaseera.
”Murtoon darbeera. Gaazaa guutummaatti ni weerarra- Hamaas ni injifanna,” jechuu gaazexeessitoonni qondaala ol’aanaa eeruun dubbatan.
Hogganoonni waraanaa garuu karoora kana morman ta’uu hogganaan ol’aanaa maqaan isaanii hin eeramne himuu Al Jazeera,BBC dabalatee miidiyaaleen gabaasuurratti argamu.
Qondaalli kuni ”hogganaan waraanaa karoorri kuni yoo tahuufi dide aangoo haa gadi dhiisu,” jedhamuutu himame.
Maatiin namoota Hamaasiin butamanii garuu murtoon akkasii firoota isaanii 50 keessaa 20 ammallee Gaazaa keessa lubbuun akka jiran amanamu balaarra kan buusu ta’uu dubbatu.
Tarkaanfii kana michoonni Israa’el balaaleffachuu malu jedhama; sababaan isaas michoonni Israa’eel baay’een waliigalteedhaan dhukaasa dhaabuu akka tahu akkasumas rakkoon namoomaa akka hir’ituudha kan fedhan.