Karaa Aadaafi Duudhaa isaa eeggateen Taphni Goobeefi Shinooyyee akka gaggeeffamu Aabbootiin Gadaafi Haadhooliin Siinqee ibsan.
OFM:Hagayya.16/2025’Abbootiin Gadaafi Haadholiin Siinqeen tapha Goobeefi Shinooyyee qaammee shan irraa kaasee taphatamu ilaalchisuun miidiyaaleef ibsa kennaniiru.
Oromoon Aadaafi duudhaa ittiin bulee bulfatu Sirna Gadaa jalatti qabu keessaa taphni Goobeefi Shinooyyee birraan dhufaa jiraachuun wal qabatee taphni taphatamu isa tokko ta’uu Abbaa Gadaa Tuulamaa Goobana Hoolaan ibsaniiru.
Taphni kun birraan dhufaa jiraachuu isaatiin gammachuu qaban Qaammee dhuma ji’a kanaa irraa kaasee hanga masqalaatti marga qabachuun tapha taphatamuudhas jedhaniiru.
Goobeen ijoollee umriin isaanii dargaggummaa keessa jiraniifi hin fuuneen kan taphatamuudha. Shinooyyeen dubartoota umrii dargaggummaa keessa jiraniifi hin heerumneen kan taphatamu ta’uu Abbaa Gadaan Goobanaa Hoolaa ibsaniiru.
Haaluma kanaan namni gaa’eela godhate dubartiis ta’e dhiirri tapha goobeefi shinooyyee taphachuu Aadaafi duudhaan Oromoon qabu kan hin heeyyamneef ta’uu ibsaniiru.
Kanaaf ijoolleen (dargaggoonni) tapha goobeefi shinooyyee taphatan uffata aadaan faayamuun sirba Aadaan heeyyamuun sirbuun, karaa Aadaafi duudhaa isaa eeggateen ta’uu akka qabu dhaaman.
Abbootiin Gadaa, Haadholiin Sinqeefi hawaasni bakka aadaafi duudhaan cabeetti akka sirraa’uu gochuun karaa aadaafi duudhaa isaa eeggateen akka gaggeeffamu gahee isaanirraa eegamu bahachuu akka qabanis Abbaa Gadaa Goobana Hoolaan irra deebiin dhaamaniiru jechuun Kominikeeshinii Oromiyaa gabaaseera.