OFM:Sadaasa.07/2025-Biyyoonni Addunyaa 64 waancaa Bara 2030 dhufu irratti hirmaachuuf kan yaadame ta’uun ibsame. Waldaan Federeeshinoota Kubbaa Miilaa Addunyaa FIFA’n baay’ina biyyoota waancaa Addunyaa irratti hirmaatanii gara 64tti guddisuuf yaada qabaachuun himameera. Pireezidaantiin FIFA Jiyaanii Infaantiinoo, karoorri A.L.A bara 2030 hojiirra oola jedhamee yaadame kun, FIFA’dhaan xinxalamaa jiraachuudha kan dubbatan. A.L.A bara 2030’tti waggaa dhibba tokkoffaan Waancaa Addunyaa itti eegalame ni kabajama jedhamuu isaa hordofee walgahii FIFA’n taa’e irratti yaanni kun ka’uudha ‘Guardians football’ kan addeesse. A.L.A bara 2030tti waggaa dhibba tokkoffaan Waancaa Addunyaa itti eegalame kun wayita kabajamu ammoo, biyyoonni yeroo jalqabaatiif waancaa addunyaa qopheessan Uraagaay, Arjentiinaafi Paaraaguway akkasumas Ispeen, Poorchugaaliifi Morookoon, gamtaadhaan waltajjicha akka qopheessan filatamaniiru. FIFA’n yeroo jalqabaatiif biyyoota tapha waancaa addunyaa bara itti aanu qophaahu irratti hirmaatan 32 irraa gara 48tti guddisuun isaa kan yaadatamuudha.