Biyyoonni marii daldalaa US waliin taasisan irratti Chaayinaan akeekkachiisa kennite.
OFM:Muddee.21/2025-Chaayinaan taarifa Doonaald Tiraamp hordofuun marii daldalaa US waliin taasifamu irratti biyyoonni Ameerikaa gammachiisuuf akka hin yaalle akeekkachiifteetti.
Dubbi himaan Ministeera Daldala Chaayinaa akeekkachiisa kana kan kennan Waashingitan mootummoonni meeshaalee gara Ameerikaatti ergan qaraxa irraa bilisa ta’een akka argatan dhiibbaa gochuuf karoorfachuu isii erga mul’atee booda.
Bulchiinsi Traamp michoota daldalaa waliin taarifa irratti marii eegaluun isaa kan himame yoo ta’u, jilli Jaappaan torban darbe Waashingitan kan daaw’ate yoo ta’u, Kooriyaan Kibbaa torban kana dhimma kana irratti mari’achuuf beellamtee jirti.
Tiraamp baatii Amajjii keessa erga aangoo qabatanii booda, Meeshaalee Chaayinaan biyya alaatii galfamu irratti taarifa ol’aanaa kan kaa’an yoo ta’u, biyyoonni addunyaa biroo hedduunis taarifa kaa’aniiru.
Dubbi himaan Ministeera Daldalaa Chaayinaa, ”Tattaaffii tasgabbeessuuf godhamu nagaa hin fidu, haala mijeessuunis kabaja hin fidu,” jedhan.
“Chaayinaan qaamoleen hundi gama haqummaa fi seera diinagdee fi daldalaa idil-addunyaa fi sirna daldala idil-addunyaa kabajuu qabu jettee amanti.”
Torban darbe ‘Wall Street Journal’ akka gabaasetti Ameerikaan marii taarifa biyyoota waliin taasiftu keessatti daldala Chaayinaa waliin taasiftu irratti daangaa haaraa kaa’uuf akka barbaaddu gabaase.
BBC’n bakka bu’oota Ministeera Maallaqaa fi Daldalaa Yunaayitid Isteets dubbisuuf yaalii godheera, garuu hin milkoofne.
”Lakkoofsa yoo ilaalle, bu’aan Jaappaan dhibbeentaa 20 US irraa, dhibbeentaan 15 ammoo Chaayinaa irraa argama,” jedhan Jesper Cole, michuu Monex Group, kan dhimma daldalaa irratti hojjetu.
Kanaaf “Jaappaan Ameerikaa fi Chaayinaa keessaa filachuu akka hin dandeenne beekamaadha.”
Erga Doonaald Tiraamp aangoo qabatanii as taarifa ilaalchisee falmiin adda addaa ka’aa jira.
Gibirri Pireezidaantiin Ameerikaa meeshaalee biyya alaatii galfaman irratti kaffalu fayyadamtoonni oomishaalee Ameerikaa keessatti hojjetaman akka bitatan jajjabeessa, Galii gibiraa dabaluu fi invastimantii guddaa gara Ameerikaatti hawwata jechuun falmu.
Garuu qeeqxonni akka jedhanitti oomishtoota gurguddoo gara Ameerikaatti hawwachuu fakkaatutti salphaa miti.
Mootummaan Ameerikaa murtee isaa irra deebi’ee akka ilaalu gorsu, kunis waggoota kurnan fudhachuu akka danda’uu fi jidduu kana diinagdeen biyyattii qormaata keessa gala jechuun ni yaadatama.
Tiraamp taarifa biyyoota kana irratti erga labsanii booda guyyaa murteen isaanii hojiirra oolu dheeressaniiru.
Tiraamp meeshaalee Chaayinaa irraa galfaman irratti taarifa dhibbeentaa 145 kaa’aniiru.
Biyyoonni addunyaa biroos hanga ji’a Adoolessaatti taarifa dhibbeentaa 10 gadi aanaa ta’e jedhamuun dha’amaniiru.
Bulchiinsi Traamp torbee darbe akka ibsetti taarifa haaraan Chaayinaan biyya alaatii galfamu hanga dhibbeentaa 245 akka gahu ibseera.
Doonaald Tiraamp taarifa biyyoota irratti erga labsanii booda biyyoonni 70 ol marii akka gaafatan gabaafameera.