BRICS sirna kaffaltii doolaara Ameerikaa bakka buusuuf qophaa’aa akka jiru gabaafame.
OFM:Muddee.22/2025-Biyyoonni miseensa BRICS dhiheenna kana ol’aantummaa doolaarri Ameerikaa daldala idil-addunyaa keessatti qabu mormuuf sirna kaffaltii haaraa jalqabuuf qophaa’uu isaanii beeysisaniiru.
Ministirri Dhimma Alaa Raashiyaa Sargee Laavroov akka jedhanitti, malli kaffaltii haaraan kun sirna aadaa irraa guutummaatti adda waan ta’eef gabaa faayinaansii addunyaa irratti jijjiirama guddaa fiduu danda’a.
Keessattuu, doolaarri Ameerikaa jijjiirraa daldala idil-addunyaa keessatti gahee homaatuu hin qabnee fi waliigalteewwan daldalaa irra caalaan isaanii maallaqa biyyoota miseensa ta’aniin Jijjiirraan Maallaqaa akka raawwatamu ni eegama.
Ministirri kun itti dabaluudhaan sirni kaffaltii haaraan kun biyyoota miseensa BRICS ala jiraniif illee banaa ta’a jedhan. Kana jechuun biyyi kamiyyuu doolaara Ameerikaa osoo hin fayyadamin daldala gaggeessuu ni dandeessi.
Akkasumas sirni kaffaltii haaraan kun sirna kaffaltii Swift kan US fi Awurooppaan to’atu irratti kan hundaa’e osoo hin taane, waltajjii kaffaltii mataa isaanii kan dhiibbaa alaa irraa bilisa ta’e uumuuf hojjetaa akka jiran ibsaniiru.
Sirni kaffaltii haaraan kun waggoota kurnan dhufan keessatti raawwii daldala idil-addunyaa irratti jijjiirama guddaa fida jedhamee eegama.
Haa ta’u malee, guyyaa pireezidaantiin Ameerikaa Doonaald Tiraamp aangoo qabatanii booda, garee BRICS maallaqa doolaara Ameerikaa waliin dorgomu uumuu danda’u kamiyyuu irratti gibira 100% akka kaffalan akeekkachiisuudhaan deebii kennaniiru.
“Yaadni biyyoonni BRICS doolaara irraa fagaachuuf yaalaa jiru jedhu waan nuhi qofa bira darbuuf deemnu miti,” jedhan Donaald Tiraamp.
Biraazil, Hindii, Afrikaa Kibbaa, Iraan, Masrii, Itiyoophiyaa, fi Yunaayitid Arab Emireet Chaayinaa fi Raashiyaa waliin ta’uun miseensa gamtaa kanaa ta’uun isaanii ni beekama.