Chaayinaan duula dhiibbaa Yunaayitid Isteets Iraan irratti taasiftu kufaa goote.
OFM:Hagayya.24/2026.Chaayinaan tattaaffii Ameerikaan qoqqobbii diinagdee Iraanirratti kaa’uuf taasiftu mormuun, qoqqobbii fi dhiibbaan waldhabdee kana hin furu jette.
Dubbi himaan Ministeera Dhimma Alaa Chaayinaa Liin Jiyaan akka jedhanitti, Beejiing waldhabdeen amma jiru dhiibbaa diinagdee osoo hin taane karaa siyaasaa fi dippilomaasiitiin furmaata argachuu qaba jedhanii amanu.
”Qoqqobbii fi dhiibbaan rakkoo kana furuuf hin gargaaru,” kan jedhan Liin, qaamoleen dhimmi ilaallatu hundi itti gaafatamummaadhaan akka socho’anii fi furmaata siyaasaa fi dippilomaasii akka hordofan waamicha dhiyeessaniiru.
Ibsi kun kan ba’e erga Waashingitan karoora qoqqobbii Iraan irratti kaa’ame hanga ammaatti ol’aanaa ta’e jette beeysistee, Chaayinaa dabalatee biyyoonni biroo duula kana akka hirmaatan gaafattee booda.
Keessattuu ijjennoo Chaayinaan qabdu kan nama dinqisiisudha; Beejiing biyya boba’aa Iraan bittuu guddaa waan taateef, hirmaannaan Chaayinaa galii boba’aa Tehiraanii fi sarara jireennaa diinagdee daangessuuf tattaaffii Waashingitan taasiftu keessatti furtuudha.
Sababa kanaan waldhabdeen kun kallattiin U.S. fi Iraan wal dura dhaabbachuu bira darbee hammaataa jira; yeroo Waashingitan duula dhiibbaa dinagdee addunyaa ijaaruuf yaalaa jirtutti, Beejiing tooftaa kana ifatti diddeetti.
Deebiin Chaayinaan yeroo dhiyoo kennite akka agarsiisutti, Beejiing tarsiimoo qoqqobbii U.S. salphaatti hordofuuf qophii akka hin taane, kanaa mannaa rakkoo bal’aa furuuf marii fi dippilomaasii gaafataa jirti.