Awustiraaliyaatti Hiriirri deeggarsa Filisxeem guddaan gaggeeffame.
OFM:Hagayya.24/2025-Awustiraaliyaatti deeggartootni Filisxeem kumootaan lakkaa’aman hiriira deeggarsaaf daandiitti bahuu qopheessitootni sagantichaa beeysisan.
Mootummaan Awustiraaliyaa Filisxeemiif beekamtii kennuuf murteessuusaa hordofee hariiroon biyyattiin Israa’el waliin qabdu rakkoo seeneera.
Gareen Palestine Action Group jedhamu Awustiraaliyaa keessa iddoowwan adda addaa 40 keessatti hiriirri deeggarsaa Filisxeem gaggeefameera jedheera.
Magaalotni gurguddoo akka Siidnii, Meelbarn fi Biriisban dabalatee guutuu biyyattii keessatti namootni 350,000 ta’an hiriira bahaniiru.
Magaalaa Biriisban keessatti qofa namootni 50,000 ta’an hiriira kana gubbaatti hirmaataniiru.
Hiriira isa Siidnii kan qopheesse Joosh Lees lammiileen Awustiraaliyaa ”haamileen bahanii Gaazaattii duguuggaan sanyii adeemsifamaa jiru akka dhaabatu, mootummaan keennas Israa’el akka qoqqobbii irra kaahu gaafataniiru” jedhe jechuun kan gabaase BBC’dha.
Warri hiriiricha bahan alaabaa Filisxeem qabatanii dhaadannoolee “free, free Palestine” jedhu dhageessisaa turan.
Kaawunsilii hawaasa Yihuudotaa israa’el jiraatanii warra hundeesse keessaa tokko hiriirichi ”haala mijataa hin taane kan uumeefi gaggeeffamuu kan hin qabne” jechuun mormeera.
Hiriirri deeggarsaa Filisxeem kun kan gaggeefame wayita Pireezidaantiin Israa’el Beenjamiin Netaaniyaahuu Gaazaa keessatti duula lafoo jabaa gaggeessuu wayita eegalanittiidha.
Dabalataan Netaaniyaahuun Ministira Muummee Awustiraaliyaa kan biyyummaa Filisxeemiif beekamtii kennan Antoniiy Albaneesiin qeeqaniiru.
Mootummaa Awustiraaliyaa jalqaba ji’a kanaa Filisxeemiif beekamtii kennuuf murtee dabarse.Hariiroon dippiloomasii biyyoota lamaanii kan hammaatees tarkaanfii mootummaa Awustiraaliyaa kana booda.
Awustiraaliyaan faana Faransaay, Biriiteeniifi Kaanadaa hordofuun haaldureerratti hundaan biyyummaa Filisxeemiif beekamtii kennuuf murteessite.
Awustiraaliyaan Hagayya 11 murtee kana kan dabarsite isa dura uummatni kumootaan lakkaa’amu Siidnii keessatti hiriira guddaa gaggeessuu booda.
Aanga’ootni Filsixeem waraanni Gaazaa erga eegalee waggaa lama guutuuf deemu lubbuu namoota 60,000 galaafachuu himu.
Gaaga’amni namoomaa Gaazaa keessa jirus addunyaa guutuutti michoota Israa’el osoo hin hafin rifaasiseera. Gaazaa keessa beelli muudachuunis mirkanaa’eera.
Odeeffannoo haarofti yeroo-yeroon akka isin dhaqqabuuf Link armaan gadii cuqaasaa…
https://oromiafreedommedia.org/
https://t.me/oromiafreedommedia
https://youtube.com/@oromiafreedommedia…