Miidiyaan hawaasaa fayyaa sammuu dargaggoota lafaa dhufan miidhaa jira! OFM:Adoolessa.13/2025-Qorannoon Yunivarsiitii Ingilizii tokko maxxansee akka agarsiisutti dargaggoonni lafaa dhufoo kanneen yaaddoo qaban miidiyaa hawaasaatiin miidhamuu isaanii guddaadha. Fayyaan sammuu dargaggoota waggoota kurnan darban keessatti dhiibbaa guddaa jala akka ture kan gabaafame yoo ta’u, kunis itti fayyadamni miidiyaa hawaasaa dargaggoota biratti dabaluu waliin walqabatee jira jedha qorannoon kun. Qorannoon kun akkasumas miidiyaaleen hawaasaa UK keessatti daa’imman umuriin isaanii waggaa 7-19 ta’an ja’a keessaa tokko haala fayyaa sammuu qaban miidhuu akka danda’u ibseera. Dargaggoonni umrii kurnanii keessa jiran kun rakkoo fayyaa sammuu hunda keessaa walakkaa bakka bu’uu danda’u, kunis oomishtummaa hawaasummaa fi diinagdee gara fuula duraa miidhuu danda’a. Yeroo mara bilbila fayyadamuun fayyaa sammuu gaarii dhabuu, keessattuu dhiphina sammuu waliin walqabatee jira. Miidiyaan hawaasaa dargaggoota rakkoo fayyaa sammuu qaban irratti warra sammuu fayyaa qaban caalaa dhiibbaa hamaa geessisuu danda’a. Qorannoon dargaggoota 3,340 irratti gaggeeffameen; Dargaggoota umriin isaanii 11-19 ta’an keessaa %16 rakkoo fayyaa sammuu tokkoo fi isaa ol qabu. Dargaggoota fayyaa ta’an waliin wal bira qabamee yoo ilaalamu, warri rakkoo fayyaa sammuu qaban yeroo baay’ee miidiyaa hawaasaa irratti dabarsuu fi jireenna hawaasummaa gadhee ta’e qabaatu. Qorannoon kun dargaggoonni rakkoo fayyaa sammuu qaban itti fayyadama miidiyaa hawaasaa isaanii sirreessuu fi dhiibbaa inni miira isaanii irratti qabu to’achuu akka qaban yaada gorsaa kaayeera.