Lagni Awaash Iluu fi Sabbata Awaas Keessa Dambali’ee Namoota Kuma Shanii Ol buqqisuun, midhaan hektaara 2400 ol mancaase.
OFM:Hagayya.05/2025-Godina Shawaa Kibba Lixaa Aanaalee Iluu fi Sabbata Awaasitti Lagni Awaash guutee jiraattota ganda sadii kuma shanii olitti tilmaamaman buqqisuu fi midhaan lafa hektaara 2400 ol irra jirus mancaasuu angawoonni mootummaa himan.
Obbo Taaddalaa Tasfaa, Bulchaan Aanaa Iluu, sababa rooba jabaa Sambata darbe roobe lagni Awaash yaa’a isaa cabsee bahe haga yoonaa guutummaa guutuutti jiraattota ganda lamaa yoo buqqisu, omisha midhaanii hektaara kuma lamaa fi dhibba afur irra ture mancaasuus himaniiru.
Horiin manaa warreen akka lukkuu, hoolaa fi re’ee hammi isaanii hin beekamnes, balaa lolaa dambali’uu Laga Awaash hordofee gandoota kana keessatti mudateen du’uullee Obbo Taaddalaan dabalataan dubbatanii jiran.
“Sambata halkan roobni roobee lagni Awaash gama Shawaa Lixaan karaa tokkoon, Aanaa Iluu keessaan ammoo karaa afuriin cabsee miidhaa kana geessise” jedhan.
Aanaa Iluutti jiraattonni gandoota Weerarsoo Qallinaa fi Muloo Seexxayii guutumaa guutuutti buqqa’an kan jedhan Obbo Taaddalaan, ammas haalli rooba gannaa dabalaa waan jiruuf yoo xiqqaati gandootni 5 sodaa dambalii lolaa kanaaf saaxilamoo ta’uu dubbatan.
Obbo Ashannaafii Nugusee Bulchaan Aanaa Sabbata Awaas gama isaaniitiin, Lagni Awaash yaa’a isaan ala bahe, jiraattota Aanaa Sabbata Awaas ganda Awaash Balloo abbootii warraa 240 buqqisuu ibsan.
Qabeenna midhaanii fi horii manaa sababa lolaa kanaan miidhame shallagaa akka jiran Obbo Ashannaafiin himanii, ammas jiraattonni ganda Awaash Balloo hafan yaaddoo keessa jiraachuu himaniiru jechuun kan gabaase Addis Standard.
Angawootni Aanotii Iluu fi Sabbata Awaas ammas roobni jidduu kana roobaa jiru, haga damabalii lolaa kana dabaluu danda’a jechaan himanii, ammas namoota naannoo lolaaf saaxilamaa ta’an irra jiraatan kaasaa akka jiran dubbatan.
Obbo Taaddasaa Tasfaa, Bulchaan Aanaa Iluu, amma namootni lolaa kana jalaa baraaraman Magaalaa Tajii Mana Barnootaa keessa qubsiifamanii akka jiran himan.
Gama qarqaarsaan qaamoleen federaalaa fi naannoo tumsa dhiyeessaa jiraatanis gahaa akka hin taane dubbatan.
Amma Konkolaataa fi bidiruudhaan hojiin namoota bakkeewwan sababaa lolaa bishaanio kana keessaa baasuu itti fufee akka jirus itti dabaluun himanii, roobni kun akkaataa kanaan itti fufnaan, Magaalaan Tajii Dambalii Lolaa Laga Awaash kanaan miidhamuu akka dandeessu sodaa jirus dubbataniiru.
Obbo Ashannaafii Nugusee Bulchaan Aanaa Sabbata Awaas, namootni buqqa’an, ganda Tulluu Araaraa mana barumsaa keessa akka qubatanii jiran dubbatanii, bulchiinsi Aanaa haga danda’ame qarqaarsa dhiyeessuuf yaalaa jiraachuu ibsan.
Tajaajilli Odeeffannoo Meetiyooroolojii Biyyaalessaa, raaga haala qilleensaa rooba Hagayyaa ilaalchisuun kaleessa ifoomseen, roobni jabaan jiddu galeessa biyyattii dabalatee bakka hedduutti roobu balaa lolaa geessisuu akka malu akeekkachiisuun isaa kan yaadatamuudha.