Tiraamp loltoota Shikaagootti bobbaasuun aangootti seeraan ala fayyadamuudha jedhan Bulchaa Illinois.
OFM:Hagayya.24/2025-Pireezidaant Doonaald Tiraamp Shikaagootti loltoota bobbaasuuf karoorsuun aangoo seeraan ala fayyadamuudha jedhan miseensa paartii Dimokiraatii kan ta’an bulchaan Illinois.
Taateen akka Eegdonni Biyyaalessaa ramadaman dirqamsiisu akka hin jirree fi pireezidaantichi ”ofiisaanii hookkara uumuuf tattaafataa akka jiran,” ibsan JB Pritzker.
Tiraamp duraanis Waashingitan DC keessatti loltoota 2,000 ta’an bobbaasaniiru.
Pireezidaantichi oppireeshinii yakka ittisuu jedhuun bakka caasaan mootummaa warra Dimokiraatotaa olaantummaa bulchu kanatti humna nageennaa ramadan.
Tiraamp Jimaata darbe dhimma kanarratti wayita dubbatan iddoowwan bulchiinsa dimokiraatotaa jala jiran lameen, Shikaagoo fi Niwu Yoork keessattis loltoota akka bobbaasan ibsaniiru.
Kantiibaan Shikaagoo Biraandan Joonsan loltoonni Eegdota Biyyaalessaa magaalattiitti bobbaafamuu ilaalchisee odeeffannoon akka isaan hin geenne ibsaniiru.
Loltoonni bobbaafamuun jiraattota magaalattiif ”yaaddoo guddaadha” kan jedhan kantiibaan kun, karoorri Tiraamp kun ”qindoomina kan hin qabne, hiika kan hin qabnee fi namuu kan hin gaafanne,” ta’uu dubbatan.
Loltoota seeraan ala bobbaasuun humnoota nageenyaa fi jiraattota walitti buusa jedhan Mr Joonsan.
Gama yakka hir’isuutiin daandii milkaa’inaa magaalattiin qabattee jirtu kan gufachiisuudhas jedhan.
Kana jidduutti ammoo Ministirri Ittisaa US 2Pete Hegseth loltoonni Eegdota Biyyaalessaa Waashingitan DC keessatti bobbaafamanii jiran akka hidhatan ajajaniiru.
Bulchiinsi Tiraamp bakka kanatti yakkoonni raawwataman ”to’annoon ala ta’aa jiru” jechuun humni federaalaa akka ramadamu murteesse, ministirri ittisaas karoora kana galmaan ga’uuf humnoota nageenyaa bobba’an hidhachiisuuf akka jiru ibse.
Torbee darbe wayita loltoonni kunneen bobbaafaman meeshaa waraanaa akka hin hidhanne ibsamee ture.
Pentagon ibsa baase keessatti ”loltoonni Eegdota Biyyaalessaa yeroo gabaabaa keessatti meeshaalee waraanaa ittiin seera kabachiisan qofa qabatanii ni bobba’u. Kunis akkaataa leenjii fi ergama isaaniin raawwatama,” jedhee ture.
Erga loltoonni kunneen bobbaafamanii garuu akka guutummaatti hidhatan ajaji darbeera. Kun tarii Waashingitan DC keessatti ergamni loltoota Eegdota Biyyaalessaa ni jijjiiramaa laata gaaffii jedhu kaasisa.
Miidiyaaleen US akka gabaasanitti torbanoota itti aanan loltoonni Eegdota Biyyaalessaa 1,700 ta’an bulchiinsota 19 keessatti ni bobbaafamu.
Bulchiinsota loltoonni keessatti bobbaafamuuf jedhan keessaa Teeksas keessatti loltoota hedduutu ramadamu.
Loltoonni ramadaman kunneen damee dhimma baqattootaa- Immigration and Customs Enforcement (ICE) jedhamu tumsu.
Tiraamp Waashingitanitti loltoota ramaduun akka milkaa’an ibsan. Ammoo wayita ergamni loltootaa guyyaa 30 booda obba’u labsii yeroo hatattamaa akka labsan ibsan.
”Haala amma jiruun toora qabanneerra, kun waan tokko. Ta’uu baannaan garuu labsii yeroo hatattamaa akka biyyaatti ta’uusaati. Kanatti fayyadamuun loltoota achi tursiisuu nan danda’a,” jedhan Tiraamp.
Odeeffannoo haarofti yeroo-yeroon akka isin dhaqqabuuf Link armaan gadii cuqaasaa…
https://t.me/oromiafreedommedia
https://youtube.com/@oromiafreedommedia…?